Две нови врвни засилувања за Вардар

Од сезоната 2016/17 нови вардарки ќе бидат Норвежанката Камила Херем и Французинката Александра Лакрабер. Херем е една од најдобрите ракометарки на Светскиот првак Норвешка и беше втор стрелец во редовите на Норвежанките на последното СП со 38 гола на девет меча. Таа настапува на левата крилна позиција, додека Лакрабер ја засилува позицијата на десен бек во Вардар

Договорот на Камила Херем со Вардар е со важност од две сезони, а Лакрабер треба да остане најмалку една сезона, со можност за продолжување. Вардар е првиот спортски клуб од Македонија што успеал да ангажира ракометар од Скандинавија, покажувајќи дека и македонските клубови се интересни за спортистите од Скандинавија.

Вардар надминува некои табуа, па ние сме прв клуб од Македонија што успеал да ангажира ракометарка од Норвешка. Секако дека сме горди што спортистка со вакви квалитети и успеси зад себе одбра да биде наш член. Александра е дел од Французинките кои беа и се дел од нашиот клуб. Вардар станува примамливо место за секој врвен спортист кој има амбиции да биде во самиот европски врв, исто како што и ние сакаме да стигнеме до него. Очекуваме Камила и Александра брзо да се вклопат во нашиот систем на играње и да се радуваме многу успеси за време на нивниот престој во Скопје, вели Давор Стојаноски, извршниот директор на Вардар.

Левото крило Херем доаѓа од тимот на Холстебро, од Данска, со кој годинава настапува во Челинџ купот на ЕХФ и 10 сезони едноподруго настапуваше во Лигата на шампионите. Зад себе има медали од Олимпијади, ЕП и СП. Последниот освоен беше златото на СП во Данска во декември 2015 година. За репрезентацијата на Норвешка има одиграно 174 настапи, постигнато 448 гола и освоено вкупно осум медали со репрезентацијата.

Доаѓањето во Вардар за неа ќе претставува враќање на големата сцена и шанса за освојување на најпосакуваниот трофеј. Таа веќе се запозна со нашиот клуб и има само најубави зборови.

„Да имате можност да играте за Вардар е нешто што се почитува. Тоа е еден од најдобрите тимови во Европа во последниве години, а јас сѐ уште имам високи амбиции и за освојување титули и за личен напредок. Мојот агент и јас бевме во Скопје и бевме импресионирани од сите услови кои тимот ги нуди. Изгледа дека сѐ е овозможено за играчите да можат да се развиваат и да играат. Едвај чекам да се преселам во Скопје и да го запознаам градот и луѓето, особено фантастичните ракометни навивачи кои ги имате", вели Камила Херем.

Александра Лакрабер е француска репрезентативка која настапува на десната бековска позиција. Лакрабер игра во Ница веќе втора сезона и прикажува фантастични партии. Таа е втор стрелец во француското првенство сезонава, со 78 гола во 12 меча, или 6,5 по натпревар. И таа има искуство во ЛШ, со екипата на Звезда Звенингород, а вкусот на медал на големите натпреварувања го почувствувала двапати, бронза на ЕП 2006 година и сребро на СП во 2011 година. Вели дека слушнала одлични зборови за Вардар и дошла да си ги исполни амбициите.

„Многу сум среќна и горда што имам можност да дојдам во Вардар. Според мене, Вардар е еден од врвните клубови во Европа, кој може да ја освои Лигата на шампионите. Зборував со моите пријателки кои играа во Вардар и ми кажаа колку професионален е клубот и дека неговите амбиции се совпаѓаат со моите", изјави Лакрабер.

Факти за Александра Лакрабер
Позиција: Десен бек
Години: 28
Репрезентација: Франција (140 настапи/370 гола)
Кариера: Борде (2002-06), Бегле (2006-08), Бера Бера (2008-09), Тулуз (2009-10), Арвор (2010-12), Звезда Звенингород (2012-13), Мио-Бигано (2013-14), Ница (2014-2016), Вардар (2016-)
Сезони во ЛШ (1): 2012-13 (Звезда Звенингород)
Титули: Шампион на Франција со Арвор (2012), Куп на Франција со Арвор (2012), Куп на Шпанија со Бера Бера (2009), бронза на ЕП 2006, сребро на СП 2011.

Факти за Камила Херем
Позиција: Лево крило
Години: 29
Репрезентација: Норвешка (174 настапи/448 гола)
Кариера: Сола (2002-2006), Бјасен (2006-2014), Баја Маре (2014-2015), Холстебро (2015-2016), Вардар (2016-)
Сезони во ЛШ (10): 2005-06, 2006-07, 2007-08, 2008-09, 2009-10, 2010-11, 2011-12, 2012-13, 2013-14 (Бјасен), 2014-15 (Баја Маре).
Титули: Куп на Норвешка (2007), злато на ОИ 2012, злато на СП 2011, 2015, злато на ЕП 2008, 2010, 2014, сребро на ЕП 2012, бронза на СП 2009

среда, 3 февруари 2016 - 12:02