Таа треба да остане во нашиот тим во следните три сезони, и ќе биде петтата нова ракометарка во нашите редови. Илина има 20 години и е репрезентативка на Белорусија од својата 17 година. Доаѓа од екипата на првакот на таа земја Гомељ и сезоната ја заврши со титула во Белорусија и во Балтичката регионална лига. Има интернационална кариера со тимот на Астраханочка во Русија, каде настапуваше во есенскиот дел од ланската сезона. Потоа се врати во Гомељ.
Во сезоната 2014/2015 за Астраханочка даде и 13 гол во ЕХФ купот. Тогаш го освои и третото место во првенството на Русија. Две сезони, од 2012 до 2014 играше во Гомељ, Белорусија по што следеше трансфер во Астраханочка. Од 2013 година настапува и за сениорската репрезентација на Белорусија.
*Доаѓаш во европски тим со големи амбиции. Веројатно ти се исполни голем сон?
„Многу малку знам за Вардар, освен само што гледам натпревари на клубот во лигата на шампионите. Вардар е навистина голем клуб со големи амбиции. Како и секој играч и мојот сон е да играм во лигата на шампионите и среќна сум дека ја добив оваа шанса. Ќе дадам се од себе, ова е навистина понуда што не се пропушта. Многу добра шанса за мене како млад играч да настапувам за екипа како Вардар и да имам вака силни натпревари. Добра шанса да го пробам и да го осетам овој квалитет на игра, вели Илина.
* Кратко време си во Скопје, бидејќи веднаш заминавте на подготовки во Словенија и на турнир. Какви се првите впечатоци, од екипата и условите, и како те примија девојките?
„Немав многу време за шетање, но од она малку време што имав ми се допаѓа и градот и салата и условите што ги имаме за тренирање. Се е на врвно ниво. Сите девојки одлично ме прифатија. Имам се уште мали проблеми околу јазичната бариера, но главните поенти ги разбирам и имам голема поддршка од колешките во тимот кои постојано ми помагаат. Засега не се оптоварувам со минутажата за играње.
* Кои се очекувањата од твојот престој во Вардар?
„Не можам да кажам за минутажа и колку би играла, но среќна сум што имам шанса да добијам пракса да играм со играчи какви што има Вардар. Верувам дека брзо ќе напредувам и ќе добијам и поголема доверба од тимот да играм повеќе и на повеќе натпревари.
* Играше за екипата на Астраханочка, а сезонава сме во иста група во лигата на шампионките. Каков е тој тим и што можеш да им пренесеш како информација на ракометарките на Вардар?
„Во Астраханочка играв 1,5 година. Среќна сум што токму тука почна и мојот подем во кариерата. Многу научив во овој тим. Имаат огромни амбиции и прекрасни млади ракометари. Има и навивачи кој ја подржуваат екипата. Сигурно ќе можам да помогнам да бидеме спремни за предизвикот што не очекува во лигата на шампионите на нашите натпревари, вели Илина.
